Tambay na Pinoy, kumonti nitong Pebrero

Bumaba ang unemployment at underemployment rates sa Pilipinas noong Pebrero, ayon sa Philippine Statistics Authority (PSA) nitong Miyerkules.
Ipinakita ng datos ng PSA na lumuwag ang unemployment rate sa 5.1 percent noong Pebrero mula sa 5.8 percent noong Enero, katumbas ng 2.66 milyong Pilipinong walang trabaho.
Bumaba rin ang underemployment rate sa 11.8 percent mula sa 13.2 percent, o tinatayang 5.84 milyong manggagawa na may trabaho ngunit naghahanap pa ng dagdag na hanapbuhay o mas mahabang oras ng trabaho.
Nananatiling nangunguna ang services sector sa may pinakamalaking ambag sa employment, sinundan ng industry at agriculture.
Ayon kay PSA Undersecretary at National Statistician Claire Dennis Mapa, nakatulong ang call center industry sa pagtaas ng hiring noong buwan na iyon.
Gayunman, nagbabala si Mapa na maaaring makaapekto sa domestic inflation at susunod na hiring ang global headwinds, kabilang ang pabagu-bagong presyo ng langis na pinalalala ng tensyon sa Middle East.
Nilinaw ng PSA na nakalap ang datos bago sumiklab ang digmaan sa Middle East.