Binigyang-diin ng Department of Health (DOH) na walang COVID-19 lockdown sa bansa, pinabulaanan ang mga viral post na nag-uugnay dito sa umano’y “Cicada” variant, at nagbabala laban sa mga pekeng pahina na gumagamit ng pangalan at logo ng ahensya.
“Wala ho talagang lockdown, peke po ang nakikita ninyo sa social media. Isa lang ang Facebook page ng Department of Health Philippines, ’yun pong may blue check kung saan naglagay na rin kami ng disclaimer,” ayon kay DOH spokesperson Dr. Albert Domingo sa isang panayam sa radyo.
Ayon kay Domingo, hindi nila alam kung saan nagmula ang mga maling impormasyon, ngunit ginagamit pa ang logo ng DOH sa tatlong pekeng pahina na may magkakaibang pangalan ngunit pare-pareho ang mensahe.
Ayon sa DOH, nananatiling mababa ang bilang ng COVID-19 cases sa bansa, na mas mababa ng 60% kumpara sa nakaraang taon.
Bumaba ang kaso mula 865 noong Enero 4 hanggang Marso 21 noong nakaraang taon sa 350 sa parehong panahon ngayong taon.
Nilinaw din ni Domingo na walang nade-detect na variant na tinatawag na “BA 3.2” sa Pilipinas at itinanggi ang paggamit ng terminong “Cicada” sa mga viral post, na aniya’y isang insekto na matatagpuan sa Amerika.
Binanggit niya na ang mga maling post ay kadalasang gumagamit ng hindi pamilyar o nakakatakot na mga termino upang makakuha ng atensyon.
Related Posts
