2 stude sugatan sa rambulan

Sugatan ang dalawang estudyante nang mauwi sa pananaksak ang rambulan ng ilang kabataan sa isang kalsada sa Davao City.
Sa isang viral video, ipinakita ang kaguluhan sa kalsada kung saan sangkot ang ilang kabataan, na karamihan nakauniporme.
Isang babae ang nagtangkang umawat ngunit nadamay sa komosyon at nadapa.
Ayon sa pulisya, nagsimula ang gulo nang saksakin umano ng isang grupo ang dalawang lalaking estudyante na pauwi na mula sa paaralan.
Nagtamo ng mga sugat ang mga biktima at kasalukuyang nagpapagaling sa ospital.
Nadakip naman ang anim na suspek na nasa edad 14 hanggang 16, at dinala sa Davao City Social Welfare and Development Office.
Sinabi ng prinsipal ng paaralan na dati nang may alitan ang dalawang grupo.