7 informant sa Cebu tumanggap ng P1.6m reward sa PDEA

Tumanggap pitong civilian informant sa Cebu ng kabuuang P1,696,349.59 na cash reward mula sa Philippine Drug Enforcement Agency (PDEA) dahil sa impormasyong ibinigay nila na nagresulta sa matagumpay na anti-drug operations noong 2025.
Ipinamahagi ang cash rewards nitong Lunes, Abril 6, sa isang seremonya sa regional office ng ahensya sa Barangay Lahug, Cebu City.
Ayon sa mga awtoridad, ibinigay ang insentibo sa ilalim ng Operation: Private Eye (OPE), isang programa na nagbibigay ng financial reward sa mga indibidwal na nagbibigay ng impormasyon na humahantong sa matagumpay na anti-drug operations. Ipinatutupad ito alinsunod sa Dangerous Drugs Board (DDB) Regulation No. 5, Series of 2003, as amended.
Hindi isinapubliko ng PDEA ang mga pagkakakilanlan ng mga informant para sa kanilang seguridad.
Sa pitong tumanggap ng gantimpala, ang informant na kinilala lamang sa alyas na “Buboy” ang nakakuha ng pinakamalaking halaga na P553,742.64 matapos magbigay ng impormasyon na humantong sa pagkakasamsam ng 6.99 kilo ng hinihinalang shabu at pagkakaaresto ng isang drug suspect sa Sitio Ibabao, Barangay Buaya, Lapu-Lapu City noong Mayo 11, 2025.
Sinabi ng mga awtoridad na lahat ng reward na inilabas sa ilalim ng programa ay dumaan sa evaluation ng isang itinalagang komite na binubuo ng mga opisyal ng PDEA at mga kinatawan mula sa business, academic, at religious sectors upang matiyak ang transparency at pagsunod sa umiiral na mga patakaran.
Ayon sa PDEA, bahagi ang reward system ng kanilang hakbang upang hikayatin ang publiko na iulat ang ilegal na aktibidad na may kinalaman sa droga, habang may mga mekanismo ring umiiral upang maprotektahan ang anonymity at confidentiality ng mga informant.
Hinikayat din ng ahensya ang publiko na makipag-ugnayan sa mga awtoridad sa pamamagitan ng official channels sa pagre-report ng drug-related activities.