9 construction workers nasagip sa lumubog na motorboat

Nasagip ang siyam na construction worker nang lumubog ang kanilang sinasakyang motorboat dahil sa malalakas na alon sa katubigan ng Barangay 12, Dolores, Eastern Samar, noong Martes ng gabi.
Ayon sa Coast Guard Sub-Station (CGSS) Dolores, nangyari ang insidente 6:50 ng gabi habang bumibiyahe ang mga manggagawa sakay ng isang hindi rehistradong pribadong motorboat mula Barangay 1 patungong Barangay Hilabaan, kung saan sila nakatalaga sa isang breakwater at seawall construction project.
Isa sa mga pasahero ang nakalangoy umano patungo sa pampang at nag-ulat sa CGSS Dolores 7:15 ng gabi upang humingi ng agarang tulong para sa iba pang sakay ng bangka.
Agad namang nagpadala ang Coast Guard ng search-and-rescue team. Gumamit ang mga rescuer ng motorboat na ipinahiram ng isang residente upang makarating sa lugar ng insidente.
Pagdating ng mga awtoridad, natuklasan nilang nailigtas na ng isang dumaan na motorboat ang dalawa sa mga manggagawa.
Nagpatuloy ang paghahanap sa iba pang pasahero nang humigit-kumulang 40 minuto, ngunit pansamantalang itinigil ang operasyon dahil sa masamang kondisyon ng dagat. Bumalik ang mga rescuer sa pampang upang kumuha ng mas malaking rescue boat.
Pagdating sa pampang, kinumpirma ng mga residente na ligtas nang nakarating sa lupa ang lahat ng siyam na pasahero matapos silang lumangoy patungo sa pampang.
Samantala, matagumpay namang nahila pabalik sa Barangay 12, Dolores ang lumubog na motorboat 11:20 ng gabi. Wala namang naiulat na nasaktan sa insidente.
===