Nasawi ang dalawang lalaking Moro at isa ang sugatan sa ambush sa isang mataong bahagi ng highway sa Sitio Panang, Barangay Salbu, Datu Saudi Ampatuan, Maguindanao del Sur, Huwebes, Agosto 20.
Ayon kina Col. Michael John Mangahis, direktor ng Maguindanao del Sur Provincial Police Office, at mga opisyal ng bayan, agad na namatay sina Kamarudin Mangansakan Ebus at Mohalidin Latip Esmael dahil sa mga tama ng bala. Sugatan naman ang kanilang kasamang si Kennedy Abdul Adin.
Batay sa imbestigasyon ng Datu Saudi Ampatuan Municipal Police Station at sa ulat ng mga opisyal ng Barangay Salbu, magkasamang sakay ang tatlo ng isang maliit na pick-up type cargo vehicle nang pagbabarilin sila ng mga armadong lalaki sa bahagi ng Cotabato-Isulan Highway sa Sitio Panang.
Patungo umano sa Cotabato City ang tatlo nang harangin sila ng mga salarin, na agad tumakas patungo sa bayan ng Talayan, Maguindanao del Sur, sakay ng mga motorsiklo.
Sinabi ni Capt. Steffie Salanguit, tagapagsalita ng Police Regional Office-Bangsamoro Autonomous Region, na naganap ang pananambang sa lugar na hindi kalayuan sa isang roadside detachment ng Citizens Armed Forces Geographical Unit (CAFGU).
Ayon kay Salanguit, nakikipagtulungan na ang mga imbestigador sa mga lokal na opisyal upang matukoy ang pagkakakilanlan ng mga salarin.
Ang mga nasawing sina Ebus at Esmael, gayundin ang sugatang si Adin na agad isinugod sa ospital ng mga emergency responder ng lokal na pamahalaan at mga pulis, ay pawang mga residente ng Cotabato City.
=====
Related Posts
